Ni Ron Guerrero
MANILA — Mariing itinanggi ni Senate President Vicente “Tito” Sotto III ang paratang ni Senadora Imee Marcos na maaaring gamitin ang 2026 national budget upang isulong ang panibagong impeachment laban kay Vice President Sara Duterte. Ayon kay Sotto, walang basehan ang akusasyon dahil nakasaad na sa General Appropriations Act ang “Anti‑Epal” provision na nagbabawal sa mga politiko na makialam sa pamamahagi ng tulong pinansyal.
Iginiit ni Marcos na ang badyet na nilagdaan ni Pangulong Ferdinand “Bongbong” Marcos Jr. ay hindi pang‑kaunlaran kundi pang‑politika, at maaaring hati‑hatiin upang magsilbing “soft pork” na gagamitin sa impeachment complaint sa oras na matapos ang isang‑taong pagbabawal sa Pebrero.
Pinanindigan ni Sotto na hindi papayagan ng Senado ang ganitong uri ng maniobra at tiniyak na may mga probisyon na pumipigil sa mga politiko na gamitin ang pondo para sa layuning pampulitika.
