Ni Vhioly Rosatazo
BULACAN — Nanawagan si Senador Joel Villanueva sa Department of Agriculture (DA) at National Meat Inspection Service (NMIS) na paigtingin ang inspeksyon sa karne at bigyan ng sapat na kagamitan, pagsasanay at teknikal na suporta ang mga lokal na pamahalaan upang matiyak ang kaligtasan ng mga produktong ibinebenta sa mga pamilihan.
Kasunod ito ng pagkumpiska sa humigit-kumulang tatlong metriko tonelada ng karne na hindi dumaan sa inspeksyon at hindi wastong nahawakan, na nagkakahalaga ng ₱634,000, sa Malolos Public Market sa Bulacan noong Oktubre 16.
Nauna ring nasabat noong Setyembre sa Santa Maria, Bulacan, ng National Bureau of Investigation (NBI) ang tinatayang 10 hanggang 15 metriko tonelada ng frozen na manok na nagkakahalaga ng ₱7 milyon, kasabay ng mga alegasyong ang mga nakumpiskang imported na karne na dapat sanang sirain ay ibinebenta.
Ayon kay Villanueva, hindi dapat magtapos sa pagkumpiska ng mga ilegal na produkto ang operasyon ng mga awtoridad. Kailangang matukoy ang pinagmulan ng karne, kung paano ito nakalusot sa inspeksyon at kung anong mga hakbang ang dapat gawin upang hindi na maulit ang mga paglabag.
“Hindi po sapat na mangumpiska tayo ng karne sa palengke. Kailangan matukoy kung saan ito nanggaling, paano ito nakalusot, at paano natin pipigilan na maulit. Our enforcement must go beyond the market stalls,” ani Villanueva.
Binigyang-diin ng senador na dapat matiyak ng pamahalaan na ang mga karne sa pampublikong pamilihan ay dumaan sa kinakailangang inspeksyon at ligtas na naiproseso, naitala at naihatid bago makarating sa mga mamimili.
Aniya, hindi dapat mapilitan ang mga pamilya na mamili sa pagitan ng murang pagkain at ligtas na pagkain.
“Ang mga pamilya ay hindi dapat pumili sa pagitan ng abot-kayang pagkain at ligtas na pagkain. Hindi natin dapat ipasa sa mamimili ang responsibilidad na alamin kung ligtas ang bawat kilo ng karne na binibili nila. Ang responsibilidad na iyon ay kabilang sa buong sistema ng kaligtasan ng pagkain,” dagdag niya.
Iginiit din ni Villanueva ang pangangailangang pangalagaan ang mga lehitimong nag-aalaga ng hayop at manok, meat processor at mga nagtitinda sa palengke na sumusunod sa mga regulasyon.
Ayon sa senador na Bulakenyo, mahalagang protektahan ang mga negosyong namumuhunan sa pagsunod sa mga pamantayan ng kaligtasan ng pagkain upang hindi sila malugi sa kompetisyon laban sa mga produktong hindi dumaan sa parehong proseso.
“Malakas ang industriya ng mga hayop at manok sa Bulacan, at mayroon tayong mga prodyuser, meat processor, at mga nagtitinda sa palengke na namumuhunan sa pagsunod sa mga pamantayan sa kaligtasan ng pagkain. Dapat natin silang protektahan pati na rin ang ating mga mamimili,” pahayag niya.
Binigyang-diin ni Villanueva na may responsibilidad ang NMIS at mga lokal na pamahalaan sa pagpapatupad ng Meat Inspection Code, ngunit kailangan nilang magkaroon ng sapat na kagamitan, tauhang sinanay at maayos na sistema ng pagsubaybay sa mga produktong karne.
Kabilang sa mga iminungkahi niyang hakbang ang pagpapalakas ng koordinasyon sa pagitan ng pambansang ahensya at mga LGU, pagbibigay ng pagsasanay sa mga inspektor, pagpapatupad ng sistema ng pagsubaybay sa pinagmulan ng karne at pagtatayo ng maayos na pasilidad para sa pagtatapon ng mga nakumpiskang produkto.
Dapat ding tiyakin ng mga awtoridad ang ligtas na pag-iimbak at dokumentadong pagsira sa mga nakumpiskang karne upang hindi na muling maibenta o makapasok sa pamilihan.
Sinabi ng senador na dapat ipataw ang angkop na mga parusang administratibo sa mga lumalabag sa mga regulasyon sa paghawak ng karne.
Para sa mga paulit-ulit na nagkakasala, iginiit niya ang mas mahigpit na pagsubaybay, mga inspeksyon na susundan ng karagdagang pagsusuri at malinaw na pananagutan.
Hinimok din niya ang NMIS, mga lokal na tanggapan ng beterinaryo, mga tagapangasiwa ng palengke at mga awtoridad na nagpapatupad ng batas na magsagawa ng magkakaugnay at hindi pa ipinahahayag na inspeksyon upang masuri ang pinagmulan ng karne, mga dokumento ng inspeksyon at kondisyon ng transportasyon bago ito makarating sa mga pampublikong pamilihan.
“Ang kaligtasan ng pagkain ay hindi nakadepende sa paminsan-minsang pagsalakay sa pamilihan. Kailangan natin ng sistema na gumagana araw-araw, mula sa katayan hanggang sa pampublikong pamilihan,” pagtatapos ni Villanueva.
Aniya, ang mahigpit at tuloy-tuloy na pagpapatupad ng mga regulasyon ay mahalaga upang maprotektahan ang mga mamimili, mga lokal na prodyuser at mga negosyanteng sumusunod sa batas.
ia/Masid
