Ni Vhioly Rosatazo
Nakiisa ang buong pamilya ni Cong Salvador Pleyto sa Kapistahan ng Sto. Niño, na naging tradisyon na nila ang magprusisyon taon-taon. Ito ay bunga ng kanilang pananampalataya na maging gabay ang mahal na Sto. Niño sa kanilang pamumuhay.
Pinangunahan ng Representante ng 6th District ng Bulacan ang pakikiisa sa prusisyon, kasama ang kanyang maybahay na si Ma’am Gerlie at ang mga anak na sina dating Sta. Maria Mayor Yoyoy, dating Sta. Maria 1st Councilor Badong, si Ma’am Grace na galing pa ng US, at si Doktora Mer. Kasama rin ang mga kamag-anak at apo mula kay Thirdy Pleyto, Tita Annie, Ate Liza, Richard, at marami pang iba.
Mababanaag sa mukha ni Tatay Ador ang lubos na kasiyahan habang nasasaksihan ang parada ng Sto. Niño.
Tuwing ika-apat na Linggo ng Enero, muling nabubuhay ang mga lansangan sa makukulay na kasuotan, masiglang musika, at taimtim na panalangin sa pagdiriwang ng Kapistahan ng Sto. Niño. Isa ito sa pinakamahalagang tradisyong panrelihiyon sa Pilipinas na hindi lamang sumasalamin sa malalim na pananampalataya ng mga Pilipino, kundi pati na rin sa ating pagkakakilanlan bilang isang bansang may matibay na ugnayan sa kasaysayan at kultura.
Ayon kay Ka Ador, ang Sto. Niño, na kumakatawan sa Batang Hesus, ay itinuturing na simbolo ng pag-asa, kababaang-loob, at wagas na pagmamahal ng Diyos sa sangkatauhan. Sa Cebu, kung saan unang dinala ang imahe ng Sto. Niño noong panahon ng Kastila, ginaganap ang engrandeng Sinulog Festival—isang selebrasyon na puno ng sayaw, awit, at dasal bilang pasasalamat at panata.
Hindi lamang sa Cebu, kundi sa iba’t ibang panig ng bansa, isinasagawa rin ang mga prusisyon, misa, at tradisyunal na sayaw bilang pagpupugay sa Sto. Niño. Makikita ang mga deboto na bitbit ang kani-kanilang imahen, nakasuot ng pulang kasuotan, at taimtim na nagdarasal para sa kalusugan, kabuhayan, at kapayapaan ng kanilang pamilya.
Higit pa sa kasiyahan, ang Kapistahan ng Sto. Niño ay paalala na sa kabila ng mga pagsubok—sakuna, kahirapan, at krisis—nanatiling matatag ang pananampalataya ng Pilipino. Dito muling pinagtitibay ang diwa ng pagkakaisa, pagtutulungan, at pag-asa na siyang nagsisilbing lakas ng sambayanan.
Sa modernong panahon, patuloy na nagbabago ang anyo ng pagdiriwang, ngunit nananatili ang diwa nito: ang taos-pusong paniniwala na ang Sto. Niño ay gabay at sandigan ng bawat Pilipino. Sa bawat indak ng sayaw at bawat bulong ng panalangin, muling ipinapaalala na ang tunay na diwa ng kapistahan ay hindi lamang nasa selebrasyon, kundi sa pusong marunong magpasalamat at umasa. /iamigo
