MANILA, Philippines — Nagsalita na si Ara Mina tungkol sa dating isyu na nag-ugnay sa kanya kay Manny Pacquiao.
Sa kanyang guesting sa “Kay Susan Tayo! Vlogs,” ipinaliwanag ng aktres na nagsimula lamang ang mga espekulasyon matapos silang magsama sa 2008 film na “Anak ng Kumander.”
Ayon kay Mina, wala namang naging relasyon sa pagitan nila ng boxing champion.
Naalala rin niya ang isang kuwento ni Pacquiao tungkol sa pagkagusto nito sa kanya bago pa man ito maging sikat na boksingero.
Ani Mina, sinabi raw ni Pacquiao na may poster siya ng Tanduay at minsan nitong naisip kung kailan niya makakasama ang aktres.
Nang usisain kung nanligaw sa kanya si Pacquiao, hindi ito itinuring ni Mina na seryosong panliligaw.
“Ligaw ba ’yun? Parang normal na,” pahayag niya.
Nilinaw ng aktres na bagama’t naging laman sila ng mga usap-usapan noon, hindi nauwi sa romantikong relasyon ang kanilang pagkakaibigan o pagkakakilala.
Si Mina ay kasalukuyang asawa ng businessman na si Dave Almarinez, na nakilala niya sa isang basketball event sa Laguna.
